اعذريني يا الهدايا .. لو سطّحتس فوق الدولاب ... !

السلام عليكم ورحمة الله وبركاته ..

ما يحتاج اقعد ابربر ..كلنا عارفين ان الهدية عنوان المحبة و دعامة لتوطيد العلاقاتقاضين منها .. بس اللي غاب عن بالي انها بمثابة الخرقة لمسح الضغائن والأحقاد من القلوب .. واحد متهاوش انت وياه .. و تبي تصالحه .. لا تجي تطوطح ايديك .. جب معك هدية .. خلك ذوق .. يحس انك متعني .. مهب آسف وانتهينا ..

الحديث عنها يطول .. لأن لها تاريخ قديييييييييم .. والدليل ان السيدة هاجر ام اسماعيل عليه السلام هي جارية أهداها ملك مصر للسيدة سارة زوجة ابراهيم عليه السلام ..

وأيضا تعكس مراحل تطور المجتمع وتدهوره .. قبل خمسين سنة كان المسافر لمكة يجيب معه للبزران عقد مصنوع من التمر اليابس .. و قبل 20 سنة صار يجيب ذيك التلفزيونات الصغار اللي تعرض صور مكة والمدينة .. والحين خالتي رايحه لمكة وقايله لولدها اللي في ثاني ابتدائي بجيب لك جوال ( n اعلى شيء ) من هناك ..

المجتمع السعودي تعامل مع الهدية بمسميات أخرى .. ( النزالة : اذا الواحد نزل في بيت العمر و رائحة البويه تفوح منه ) ( الرفاعة : دراهم تُدعس في مهاد المولود لين يصير وزنه 100 طن .. أو هدية اخرى تخصه .. على طاري ذا اللي تخصه .. وحده والده تقول جاني حول درزن جلّاسات بزران .. كن ولدي معد هو ماشي ابد .. بسم الله عليه .. أغلب هدايانا تقليدية ومكررة ) .. ( الحفالة : مرافقه ل امباركين عرس الاثنين ) .. ( والرضاوة : ما يدفعه الزوج لزوجته اذا اعرس عليها .. كتكفير يعني .. مهب قلنا ان الهدية تزيل الأحقاد ) .. ( قدر صغير يُرسل مع بزر صغير مع اعادة عبارة " تقول امي ذوقوا غدانا " على مسامعه مراراً وتكراراً حتى يحفظها ويسمّعها عند باب الجيران ) .. حث الرسول صلى الله عليه وسلم على هالنوع الأخير اللي أحس انه بدأ ينقرض وقال ( اذا طبخت مرقة فأكثر ماءها وتعاهد جيرانك ) ..

و يُلاحظ ان الهدية بدأت تأخذ منحنى ( سلّم واستلم ) وخاصة في المناسبات الاجتماعية .. اللي يهديني اهديه واللي مايهديني لو يبي وشُو ما عطيته ..

اختيار الهدية بحد ذاته فن يعكس ذوق المُهدي وشخصيته و تفكيره .. مثل قصة ذاك المهوّي وبقوه .. اللي يقول فكرت أهدي زوجتي هدية ما تنساها .. جبت قارورة جميلة .. وكتبت لها رسالة أجمل .. نطلتها في القارورة و تنفست في القارورة ملء رئتي .. وسديتها بسرعة .. علقت في القارورة كرت كتبت فيه " لا تحاولين تفتحين القارورة وتقرين الرسالة .. لأني بأطير من بين ايدياتس مع انفاسي اللي بتطير " ..
يقول زوجتي نششششبت هنا <- يأشر على حلقه .. معد لنا سالفة الا ذا القارورة اللي خلت الفار يلعب في عبّها خخخخخخخخخخ .. وانقلبت ذا الهدية نكد .. كل شوي تسألني وش اني كاتب فيها .. " انت معرس علي .. أجل وش اللي بطير من بين يديتس " , " انت مسوي لك بلوى ومعترف بها في الرسالة .. "
لين طقت تسبدي وبغيت اهبدها بالقارورة .. فتحتها وقريت لها الرسالة وافتكيت من شرها ..

وبالمقابل يجب ان توافق اهتمامات المُهدى اليه وجنسه و سنه .. يعني مهب معقولة اعطي حرمه كبيرة لعبة تركيبة واقول هذه هدية .. أم جيراننا تقول اننا منب نروح لمحلات بادريق نقضي مواعين .. تجينا دلفري .. ولدي ما يهدونه المدرسة الا جيك وطقم كاسات ههههههههههه .. و في آخر العام أهدوه علبة هندسة ! .. عسى ماشر .. صح انه شاطر بس مهب لدرجة انه يدرس في العطلة .. قام صاال و سطّح العلبة فوق الدولاب ..

السؤال اللي يطرح نفسه ألحين .. أين يكمن جمال الهدية .. في قيمتها المادية أم المعنوية ؟ المادية <- وحده عينها على شيء غالي وتبيه باللي هي به ..
يقول فهد الأحمدي في أحد مقالاته اننا حنا العرب للأسف نميل للهدايا الثمينة .. اللي سعرها فيه طابور من الأصفار .. بينما الغرب يميلون للهدايا البسيطة التي تحمل معاني كبيرة .. وسرد قصة الوفد الطلابي السويدي اللي جونا من كم سنة علشان يتعرفون على ثقافتنا المحلية .. وفي الحفل الختامي اهدينا كل واحد ساعة سويسرية غالية .. وفي المقابل عطونا كورة ثلجية من ثلوج السويد بعد ما عالجوها كيميائيا علشان ما تميع !! ..

( لا تعطيني هدية بس اكفني شرك ) .. تُقال هالعبارة لواحد منّان .. و لآخر ما يعدل .. وحده مدرسة في الروضة .. تقول في الحفل الختامي حطينا صندوق ونوعنا فيه الهدايا .. ما بين حلو و حليو .. وكل واحد يدخل يده و يأخذ .. تقول نص البزران طلعوا من الروضة ووجيهم كذا ( ) ههههههههههههههههههه .. وينطبق ذا على العيال .. تهدي واحد و تترك الثاني يناظر ..

الشيء الأخير .. حنا مقبلين على شهر كريم و عيد .. لا تنسون والديكم من هدية جميلة .. و الكلام لي اولكم ..

الموضوع لكم .. سولفوا عن هداياكم .. غرائبها وعجائبها .. نظرتكم الخاصة لها .. عادات اجتماعية تتهادون فيها .. الخ ..

و كل عام وأنتم بخير ..
مع السلامة ..

موضووع حلوو

<< اكثر وحده تحتففظ بالهدااايا

واقدرها بشكل ,, كبير

:::

احب ابدع بالهدايا خخخ

واكثر شي اهدي بمناسبه الميلاد تقريبا

واكثر هديه حبيت فكرتها

كنت سارقه الفكره من خالي

الللي اغلف الهديه بسلاسل واحط كم قفل عليها
ومفاتييح غيير

وهي عاد تقعد تفحط كيف تفتحها ,,

تقبلي مرووري,,

احناا بوقت اغلب الناس يهتمون بالجانب المآدي للهديه
بالنسبه لي بالجانب المآدي مايهمني
بس انا اهدي .. ومـآأقتنع بشي عادي عشان اهديه
ولو جتني هديه .. غلات الهديه بتكون من غلا صاحبتهاا
وحلو ان الواحد ماياخذ الهديه من اي شخص

عواافي عالموضوع
تسلم ايدينك

اه ياالهدااايا صح انها شي بسيط بس مررره توسع الصدر -->>برا احنا باالعيد لاااااازم هدايا ماجبتي هديه لاتجين Sad

وبرمضان احب اهدي مصحف ..لانه شي يفيدنا دنيا واخره وانا اقول مثل ماقالت المايسترو غلاه الهديه من غلاه صاحبتها ..مشكوره خيتو

يــــــــســـــــــلـــــــــمــــــــــــوو