اجلد .. اصفق .. امحط .. تصبح نسخة من بعض أساتذة هذا الزمان ... !

السلام عليكم ورحمة الله وبركاته ..

" الله يتمم عليك يا وليدي .. من بدّ أخوانك ما قد شقيت بي " .. هذا ما رددته أم سعد وهي تقز ولدها سعد المتولم و المتكدد من الساعة الخامسة والنصف صباحاً استعداداً للإنقلاع إلى المدرسة .. <- وش يكد يا حظي وهم محلقينه على الصفر .. لا والبلا إن فلقات وأخاديد الماضي بدت ظاهرة للعيان ..

سعد طالب في الصف الثاني الإبتدائي .. بوادر الشقردية والذكاء كانت واضحه على محياه الأغبر البريء .. هو صورة مثالية للولد الشاطر النظيف .. اللي يكد شعره على جنب .. <- يا بنت الناس اثبتي لتس على كلمة .. هماتس تو تقولين أصلع .. امه ما عانت مما عانوا منه نص أمهات الشعب .. ما قد قالت له : ( قم ادرس ولا ترى بأعلم ابوك يرفع عنك الأتاري , ولاّ اخمد ترى الساعة 11 .. بكره الصبح منتب قاوي تفتح عينك يا التسلب , ما قد تفقّدت دفتر واجباته ولقت الاستاذ كاتب له : الطالب دبشة لا يحفظ .. ومستواه ضعيف .. أرجوا الاهتمام به أكثر !! ) ..

انقلب الحاااال بعد أن دخل على فصل سعد الأستاذ ( محمد ) .. اللي أول خطوه سوّاها انه لوّح بيده ذا اللي كنها يد باكستاني من كبرها وقال ( قسمن عظمن اللي بأسمع له نفس و أنا أشرح بألفعه بكف يطلّع روحه .. مفهوم ؟ ) .. ما انتهت الحصة الا وطالب مسجّى على طاولة الفصل .. مصاااااااب !! ..

مربي الأجيال بدال ما يتفنن في أساليب التدريس .. تفنن في أساليب التعذيب .. على سبيل المثال لا الحصر .. جاء سعد في يوم من الأيام واصبع يده وارم ومنقلب لونه .. معذب الأجيال داعس بين أصابعه قلم وراااص عليه لين بغت تنتق عيونه .. لأنه لخبط وهو يسمّع انشودة ( أبي دعاني إليه .. والحب في يديه) .. <- يا اخي وش عليك منه .. يحفظ ولا يقعد .. اهو وابوه يتصافون .. بس عز الله ان الاستاذ طلّع ذا الحب في ايديات الولد !! ..

يبدأ الأكشن في بيت سعد مع زقزقة العصافير .. أول ما تقومه امه يتميرض علشان يغيب .. واذا ما انطلت على امه الحيلة يلقط نفسه و يطير للمستودع التحتي و يقفل على نفسه الباب .. و رغم ان لمبة المستودع محروقة وهو يخاف من الظلام .. إلا انه يحس انه اهون من مقابل استاذه .. المشكلة انه يدرسهم كل المواد ماعدا الرياضة و الرياضيات والعلوم .. تبدأ امه تحايله وتقوله بأغيبك بس افتح الباب .. واذا فتح لبّسته ثوبه بالغصب و أرسلت شنطته مع اخوه للسيارة وتلته مع علباه و شاته للمدرسة ودموعه أربع أربع .. دلع بزران !! ..

على الجلد والدبغ اللي يجيه الا ان مستواه الدراسي متذبذب .. والنفسي في الحضيض مره وحده .. انتهى العام الدراسي .. نجح سعد وانطوت صفحة ..

في العام اللي بعده .. كان سعد اسبوعياًُ يضرب مشوار للقرطاسية القريبة من منزلهم ليشتري صحيفة و قلم خطاط لون جديد و يتوجه لأخوه الكبير ويطلب منه وهو فاق خشته انه يخطها له و يكتب تحتها ( عمل الطالب : سعد .. اشراف المعلم : ابراهيم ) .. ابراهيم هذا ما فتئ يردد ( يا بطل .. يا شاطر .. يا مهندس ) على مسامع طلابه ومن ضمنهم سعد اللي حذف من قاموسه كلمة ( أبغيب ) ومستواه الدراسي رجع للعلالي وقودي ..

الأيام تركض .. تخرج سعد و تعيّن مدرس على بند الأجور .. في أول يوم دراسي ذهب و الأمل والحماس شوي و يطفر من عينيه .. كان مقرر انه يستفيد من تجاربه الجميلة مع اساتذته و يتجنب المؤلمة و العنيفة .. دخل على فصل 3 / 5 في احدى المدارس المتوسطة و الابتسامة شاقه وجهه .. سلّم .. وعرف بنفسه و شوي إلا يسمع :

- عمىىىى .. يا طول وجهه هههههههههههههههههه ..

- شكله فاهي ومخفه .. خل نتلطم ونرقد بس …

هذا غير الجمهور اللي من ينطل الواحد كلمة تشققوا من الضحك .. تجاهل تعليقاتهم و بدأ الدرس .. انتبه انه معد صار يسمع صوته من الصجة .. انقلب الفصل جلسة سامري .. لا شعورياً هز رأسه وقال في نفسه : والله ما ينلام الأستاذ محمد على ذاك الدبج اللي جانا منه !! .. توجه لأول طالب طاحت عينه عليه وهو يستهبل " اللي قال يا طول وجهه .. ماش حارّه قلبه الكلمة " و مسح فيه البلاط .. و أدب به البقية .. انتهت الحصة والفصل لو طاحت فيه ابره سمعوا صوتها من الهدوووء..

في اليوم الثاني .. استدعى وكيل المدرسة اللي لحق على نظام الكتاتيب سعد .. وطلب منه التوقيع على ورقة ..

" أوقع على وشو "

" على ورقة لفت نظر ( تعهد ) .. انت امس ضارب الطالب فلان الفلاني .. وجاااء ابوه اليوم يشتكي و هو صااايل وحمقان .. يا ولدي انت ما تدري ان الضرب صار ممنوع ؟ "

أشار لي سعد وهو مقهور و قالي ڪلآسييييڪ جيبي موضوعتس وتعالي " شف يا أستاذ علي هذه قصتي كااااااملة من يومني صغير .. ثانياً أنا ما ضربته من الباب للطاقه .. هو البادي "

تناول الأستاذ علي الموضوع و بدأ يقرأ بروية ثم قال " انت وأستاذك محمد ما انتبهتوا لأهم نقطة في العلاقة بين الطالب والمعلم و هي ( الحزم بدون عنف واللين بدون ضعف ) !! ..

:
قد انجلدتوا مثلي .. اذا كان الجواب ايه فاسدحوا قصصكم واسردوا اساليب التعذيب اللي مارسوها عليكم و اتحفونا..



هل تؤيدون الضرب كوسيلة تعليمية .. مع التوضيح ؟ <- عليه ثلاث درجات ..

تشوفون ان فيه فرق بين الأجيال الحاضرة والماضية من حيث الشدة وانقلاب السلطةو تحولها ليد الطالب زي ما قال ساحر ؟ <- مصطلحات كبيرة مدري وشلون طلعت معي .. عساها صح بس ..

المحاور كثيرة والبرابير واجدة وحياكم الله

وسبحانك اللهم وبحمدك .. أشهد أن لا اله الا أنت .. أستغفرك و أتوب إليك ..

اهنييييييييييك علي اسلووبك

خخخخخخخخخخخخخخخخخخخخخخخخخخخخخخخخخخخخخخ
والله يعني ننجلد بس مهوب مررهـ
اخر مــره انجلد عشان اذكـــر -->طراه انه نايمه عن الاختبار النهائي !!
ايه والله يختي اللجد ياادب البزارين !! اجل وشسمه كيف نقدر نربيهم بدوون ضرب !!-->برررا
الضرب يخلي الطفل يخاف ويدري وش عقابه !!
يعني لو ماكان يضرب مراح يهمه حاجه !!